حب في ديسمبر.. شعر: سمير الفيل

شجرة ياسمين.

بتفرع من قلبي وتروح البستان.

انا مش حيران..

ولا دمعي بنزل على عيني.

أنا واقف وحدي..

.. بأعد سنيني .

وبامد الإيد ..

لبعيد ..

بأشاور ..

على أي سحاب شكله سعيد.

ياخد إيدي ، ويوريني مكان العيد.

يحصي دقات قلبي..

.. قبل ما اعدي بيوت ودروب.

بامشي في طريق متسفلت بذنوب .

فرع الياسمين جوايا اتمد .

مااملكش الرد

: أزاي انت دخلت الملكوت.

أيه طعم حبة توت ؟

أيه الفرق بين همس مجرة وصوت كتكوت ؟

اللي انا عارفه كويس

إن القلب .. كان قرب إنه يموت

أصبح في يقينه أنه يغني

وينط الحبل

وانه يخطي كمان السور

ويعدي من الضلمة للنور.

يمسك إيدها الدفيانة فتنزل دمعة.

بين الدال والعين.

وشريط أزرق مربوط ف فيونكة ملان بحنين !

فيه عزف كمنجة بوسع الكون

أوتارها مشدودة بعرض أفريقيا

فيه باكية

بيبكي تحتها مطر جاي

.. من قلب ديسمبر

وعيونها تطل عليا ..

.. فيما أكون مشغول

بأعد السحب المارة في سمايا

دي حكاية

.. بدون حبكة أو حتى نهاية

وحبيبتي بلون زهرة ف يناير الجاي .

الآي تكبر وتكبّرني

وقصيدة شعر ترج الصدر ..و ترجعّني

صبي أخضر..

في إطار الصورة، تسمّرني !

البحر مد وجزر

زي الحب الجاي متغرب..

.. من أبعد حتة في الملكوت.

حس المطر جوايا :

شارع ، أنغام، وبيوت

وخيوط منسوجة بلون وردي..

.. مايل لزراق.

فسلام ع البحر .. الغيم.. الأصداف.

سلام على قلب..

.. حب في ديسمبر

وسط البرد اللي بيرجف عمري ،

.. ما خاف .